Naospital ang kapin 20 ka mga tawo sa Balasan matapos naglain ang pamatyag kag ginpatihan nga bangud ini sa ila ginkaon nga isda nga bansa ukon barracuda.
Sa interview sang Bombo Radyo kay Jingky Delgado, fish vendor sa Balasan Public Market, iya ginpahayag nga ginkompra nila ang isda sa Estancia kag ginbaligya sa ila pwesto sa Balasan.
Suno sa iya, may mga suki sila nga nagaluto sa karinderiya nga nagbakal sang kinihad sang amo nga isda.
Pahayag ni Delgado, sila mismo ang nagluto man sang amo nga isda sa ila balay kag matapos sila nagkaon, nakaeksperyensiya sila sang pagpalanuka, nagsakit ang tiyan kag nabudlayan sila nga maghulag.
Suno kay Delgado, lima gid sila sa ila pamilya ang naglain ang pamatyag.
Dugang ni Delgado, ang ido nga nakakaon sang isda ang nagmasakit man.
Nadala naman sa Bureau of Fisheries and Aquatic Resources ang sample sang isda para ipaidalom sa eksaminasyon.
Sa data naman sang Jesus M Colmenares District Hospital sa Balasan, 24 tanan ang ginpangdala sa amo nga ospital matapos nagkaon sang amo nga isda.
Nagpangayo naman sang pasaylo si Delgado bangud sa natabo.
Kasunod sang insidente, nagpagwa sang advisory ang Balasan Care Facility sa tanan nga pumuluyo nga maglikaw anay sa pagkaon sang amo nga isda nga dalagko kag predatory bangud ini ang mahimo magtuga sang ciguatera fish poisoning (CFP).
