Gin-anunsyo sang Philippine Embassy in Beijing nga nagaplano ang China nga magpadala sang trade delegation sa Pilipinas sa Oktubre subong nga tuig.
Tuyo sini nga mapasangkad pa ang oportunidad sa pag-invest sa nanuhay-tuhay nga areas lakip na sa enerhiya, teknolohiya, agrikultura, manufacturing, turismo, kag iban pa.
Wala pa sang ginpaguwa nga dugang nga detalye kaangot sa plano.
Ini nga investment mission ang kasunod sang trade symposium nga gin-organisar sang embahada, Department of Trade and Industry, kag mga tiglawas sang Philippines-China business chambers sang nagligad nga Agusto 22.
Nagtambong sa event ang Global Investment Council, isa ka non-profit group nga nagantanyag sang consultancy and resource matchmaking para sa multinational corporations, Fortune 500 firms, ang leading Chinese companies, masobra sa 40 representatives halin sa China-Philippines Chamber of Commerce (CPCC) kag Chinese Entrepreneurs Association of the Philippines (CEPA).
Suno kay Philippine Ambassador Jaime FlorCruz, isa ka welcome development ang business exchanges sa tunga sang Pilipinas kag China ilabi na kadungan sang ika-50 nga anibersaryo sang diplomatic relations sang duha ka pungsod subong nga tuig.
Ang China amo ang pinakadaku nga trading partner sang Pilipinas; kag ini man ang ika-apat sa pinakadaku nga source sang Pilipinas sang investments para sa period nga Enero tubtub Hunyo 2025.
