Wala sa gihapon nadakpan ang babaye nga timbang nga nagkawat sa masobra P100,000 nga cash sang iya amo sa Brgy. San Isidro, Jaro, Iloilo City.
Sa interview sang Bombo Radyo kay Police Lieutenant Owen Andrada, deputy chief of police sang Iloilo City Police Station 3, at large ang status sang suspek nga si Liza Tacan Tagacay, 28, kag residente sang Brgy. Bato, Tubungan, Iloilo.
Gin-untat naman ang hot pursuit operation, apang natigayon na nga mapasaka ang reklamo sa piskalya sang Agusto 26 paagi sa regular filing.
Tatlo ka adlaw pa lang ang suspek nga naga-trabaho sa balay sang gintaban sini ang P118,000 nga cash nga gamiton kuntani sang amo para sa medical procedure sang iya nga iloy nga isa ka cancer patient.
Online lang na-hire ang kabulig kag wala na na-id-id sang amo ang pag-background check.
Ulihi na nadiskubrehan nga kilala ini sa iban nga lugar nga may kaangay nga kaso nga pagpangawat lakip na sa Miagao kag may nauna man nga record sa Mandurriao Police Station kun sa diin napreso ini apang nakapyansa.
Nagpanugyan ang mga pulis nga kun may kuhaon nga timbang sa balay, pangayuan gid sang police ukon NBI clearance agud mas makilala ang identity kag malikawan ang kaangay sini nga insidente.
