Ginaduso sa Kamara nga buhinan ang value-added tax (VAT) halin sa 12% pakadto sa 10% agud mabuligan nga magnubo ang inflation ukon pagsaka sang presyo sang mga produkto.
Si Batangas First District Representative Leandro Leviste ang nag-file sang House Bill 4302 ukon VAT Reduction Act of 2025.
Suno sa iya, nagdako na gid ang nakuha sang gobyerno sa VAT halin P156.67 bilyon sang 2005 tubtob P1.20 trilyon sa 2024, gani masarangan pa gihapon nga ibanan sa 10% bisan pa madula ang P200 bilyon nga kita.
Ginsiling ni Leviste nga mabug-at ang VAT labi na sa mga pigado kag middle class, gani makabulig gid kun ibanan ukon buhinan ini para mangin patas ang sistema sang buwis kag malikawan ang mataas nga inflation.
Ginsiling man niya nga ang 12% VAT sa Pilipinas ang pinakamataas sa Southeast Asia ipaanggid sa iban nga pungsod pareho sang Vietnam, Cambodia, Indonesia, Singapore, Thailand, Malaysia, Laos, kag Myanmar.
Ang ini nga ginaduso nga hagna nagatugot man nga temporaryo nga ibalik sa 12% ang VAT kon sobra sa target ang budget deficit sang gobyerno.
Ginsiling naman ni Finance Undersecretary Karlo Adriano nga pagatun-an nila ang proposal.
