Padayunon sang Police Regional Office (PRO) VI ang five-minute response policy nga isa sa mga ginplastar nga pagsulundan sang yara pa sa pwesto si former Philippine National Police (PNP) chief Gen. Nicolas Torre III.
Suno kay PRO 6 Regional Director Police Brig. Gen. Josefino Ligan, ang madasig nga pagresponde ang nakabutang man gihapon sa 1st-point agenda sang bag-o nga PNP Chief nga amo ang enhanced management of police operations.
Pahayag sini, adlaw-adlaw sa gihapon ang simulation exercise ukon simex para masiguro nga makadul-ong sang madasig kag epektibo nga pag-responde sa mga emerhensya kag kun may public safety concerns.
Kaangot naman sa internal discipline sa mga pulis, ginpaathag sang regional director nga wala siya nanamian sa nangin liderato kag superbisyon sang anay hepe sang Janiuay Municipal Police Station nga si Police Captain Hector Ayagan.
Ini ang rason kun ngaa ginpa-islan niya ini kasunod sang iya ginhimo nga inspeksyon.
Ginsaylo si Ayagan sa Iloilo Police Provincial Office Headquarters; samtang nagbulos naman si Police Captain Marlon Perez bilang hepe sang Janiuay.
