Nadakpan sa ginpatigayon nga entrapment operation ang isa ka empleyado sang City Planning and Development Office matapos ginreklamo sang robbery-extortion.
Natabo ini sa Olongapo City.
Suno sa National Bureau of Investigation (NBI), magabukas sang dental clinic ang babaye nga biktima kag nagpadulong sa amo nga opisina kun sa diin ginpangayuan ini sang duwa ka mga empleyado sang P98,100 para sa zoning, locational, kag occupancy permits.
Sa entrapment operation, naaktuhan nga nagabaton sang kwarta ang nadakpan nga suspek samtang ang ikaduwa nga suspek ang wala sa lugar sang natabo ang operasyon.
Nagdepensa ang nadakpan nga suspek nga ginbuligan lang niya ang biktima kag ang amo nga kantidad ang “quotation” lamang para sa tanan nga balayran.
Gin-athag naman sang otoridad nga wala sang gahum ang amo nga empleyado nga magbaton sang bayad para sa mga amo nga sahi sang transakasyon.
Pasakaan ang mga suspek sang kaso nga paglapas sa Republic Act 3019 (Anti-Graft and Corrupt Practices Act) kag Republic Act 6713 (Code of Conduct and Ethical Standards for Public Officials and Employees).
