Nagpatigayon ang Israel sang airstrike sa Doha, Qatar apisar pa nga ang amo nga pungsod amo ang mediator ukon ang nagapatunga para sa ceasefire para sa duha ka tuig nga gyera sa Gaza.
Ini ang una nga bes nga gin-target sang Israel ang sulod sang Qatar nga kumpirmado nga nagbilin sang lima ka mga patay lakip ang isa ka myembro sang Qatari security forces.
Base sa Hamas, nakaluwas sa atake ang ceasefire negotiating team; kag suno naman sa Israel, ang target sang ila nga strike amo ang mga lider sang Hamas lakip na si exiled chief kag top negotiator nga si Khalil al-Hayya.
Natabo ang airstrike matapos nga gin-ako sang armed wing sang Hamas nga al-Qassam Brigades nga sila ang responsable sa pagpangluthang sa bus stop sa Jerusalem nga nagbilin sang anum ka mga tawo nga patay.
Sa statement sang Qatar, gintawag ang atake sang Israel nga “blatant violation” sang international law. Sa pahayag naman ni Israeli Prime Minister Benjamin Netanyahu, wala sila sang ihatag nga “immunity” sa kay bisan-o sin-o nga lider sang Hamas.
