Hugot nga ginpanginwala sang apat ka mga babaye kongresista sa Iloilo nga sila ang sa likod sang tuyo nga pagpahalin kay Dr. Joseph Dean Nicolo bilang Chief sang Western Visayas Medical Center.
Kasunod ini sang naggwa nga impormasyon nga isa ka lady official ang naghingyo kay Department of Health Secretary Ted Herbosa nga sayluhon si Nicolo sa Zamboanga apang sang ulihi, gin-recall man ang nasambit nga department order.
Ang mga kongresista nga nag-deny sang ila involvement sa amo nga isyu amo sanday Iloilo City Lone District Representative Julienne Baronda, Iloilo 1st District Representative Janette Garin, 2nd District Representative Kathy Gorriceta, kag 5th District Representative Binky Tupas.
Sa interview sang Bombo Radyo kay Garin, iya ginpahayag nga bilang Secretary sang Department of Health sadto, yara sa hurisdiksyon sang tiglikom ang pagsaylo sang isa ka hospital chief.
Apang suno kay Garin, may nagakaigo nga proseso diri kag may imbestigasyon nga dapat himuon kun ano gid ang rason sang pagpahalin sa isa kag hospital chief.
Pahayag ni Garin, sa iya pagpakig-istorya kay Herbosa, ginsiling sang tiglikom nga ang tawo nga nag-request sang pagpahalin kay Nicolo ang may yara sang alegasyon nga nakakumiter ang hospital chief sang corrupt practices kag incompetence.
Apang suno sa kongresista, kinahanglan nga may yara sang mga ebidensya nga ipresentar batok kay Nicolo.
Ginpunto man niya nga bisan pa nga may mga pending cases sa Ombudsman si Nicolo, indi ini bastante nga rason agud pahalinon ini sa iya posisyon.
Dugang niya, indi man mahimo nga sayluhon si Nicolo halin sa isa ka tertiary level government hospital panaog sa Level 1 hospital pareho sang Labuan District Hospital kun sa diin kuntani ini sayluhon.
Sa bahin naman ni Rep. Baronda, ginsiling sini nga kabutigan ang pag-angot sang iya pangalan sa isyu.
Suno sa iya, wala siya sang oras sa pamulitika kag masako siya sa iya trabaho sa kamara.
Sa bahin naman ni Gorriceta, iya ginsiling nga wala niya ginpa-transfer ang Medical Center Chief sang ospital.
Wala naman sang ideya si Rep. Tupas kun ano ang isyu.
