Ginatugyan na lang ni Iloilo 1st District Rep. Janette Garin kay Uswag Ilonggo party list Representative Jojo Ang ang pagsabat kun may kahilabtanan gid man ini sa korapsyon.
Ini matapos nga ginpangalan sang mag-asawa nga Curlee kag Sarah Discaya si Ang bilang isa sa mga opisyal nga nagapangayo sang 10% tubtob 25% nga kickbacks halin sa mga kontrata nga gina-award sang gobyerno sa ila bilang kontraktor.
Sa interview sang Bombo Radyo kay Rep. Garin, iya ginpahayag nga si Ang ang nakahangop sa isyu kag mas maayo nga siya ang magdepensa sang iya kaugalingon kag kinahanglan nga hatagan ini sang benefit of the doubt sa amo nga isyu.
Apang suno sa kongresista, sa mga akusasyon sang mga Discaya, may mga red flags ini nga nakit-an angot sa pag-ulamid nila sang mga pangalan sang mga opisyal sang gobyerno.
Suno kay Garin, isa na diri ang pagtudlo sang mga Discaya kay Rep. Roman Romulo nga ginsiling nila nga nagakuha man sang kickback, apang pahayag ni Garin, kwestyonable ini bangud nga magkasumpong sa pulitika sanday Roman kag Discaya.
Dugang sang kongresista, kaangay nga gin-coach lang ang mga affidavit sang mga Discaya bangud nga may mga porsyon sini nga ginlimitahan lang ang paghatag sang data angot sa mga ginkita nila sa mga nauna nila nga mga transaksyon sa gobyerno.
Ginpahayag man ni Garin nga mas maayo nga itugyan man sa independent body nga tukuron ni President Ferdinand Marcos Jr. ang pag-imbestigar sa mga myembro sang Kamara nga gin-ulamid sa anomaliya.
Samtang, inrekomendar naman ni Garin ang paglibot sa tanan nga mga flood control projects kag kun may makit-an nga damage, mahingagaw nga ma-rehabilitate ini samtang active pa ang warranty.
Nagpasalig man si Garin nga suportahan niya kun may patigayunon nga inquiry ang Iloilo Province sa mga flood control projects.
