Naglab-ot sa P7.4 million ang nagasto sang Office of the Vice President (OVP) para sa security kag personnel nga gin-upod sa mga byahe sa luwas sang pungsod ni Vice President Sara Duterte.
Ini ang ginpahayag sang Bise Presidente sa ginpatigayon nga budget hearing sang House appropriations committee para sa ginaduso nga 2026 budget sang OVP.
Ang pamangkot ang naghalin kay House Assistant Minority Leader kag Kabataan party-list Representative, Renee Co.
Suno kay Duterte, apisar indi gin-charge sa pondo sang OVP ang iya personal nga gasto sa mga byahe sa abroad, kaangay sang pamasahe kag akomodasyon, ang gasto para sa iya security detail kag OVP staff amo ang ginbayaran halin sa opisina.
Ginpasiguro man sang bise presidente nga ini nga mga gasto ang kabahin sang seguridad kag epektibo nga pagserbisyo sa iya katungdanan bilang ikaduha nga pinakataas nga opisyal sang pungsod.
Padayon pa ang deliberasyon sang Kongreso sa ginaproponer nga budget para sa OVP sa 2026.
