Dakop ang isa ka babayi nga traffic enforcer sa ginpatigayon nga entrapment operation sang kapulisan sa Brgy. Nabitasan, La Paz, Iloilo City.
Ang nadakpan amo si Alyas Therese, 26, kasado kag residente sang Brgy. Bitoon, Jaro, Iloilo City.
Sa interview sang Bombo Radyo kay Police Captain Jeffrey Delgado, hepe sang Iloilo City Police Station 2, iya ginpahayag nagreklamo ang biktima sa ila opisina matapos indi na niya masarangan ang padayon nga pagpangilkil ni Therese, kag ginsiling pa nga masami ini nagatawag kag nagapangayo sang kwarta.
Nahibaluan nga nagsugod ang pagpangayo ni Alyas Therese sang kwarta sa biktima sang Marso, nga una nga kantidad amo ang P500.
Nasundan ini sang Abril sang pareho nga kantidad, kag padayon nga nagpangayo tubtob sang Agosto kag Setyembre sang mas dako nga kantidad.
Ginpahayag ni Delgado nga sa kabug-usan, naglab-ot sa masobra P29,000 ang nakuha ni Alyas Therese sa biktima.
Sa subong, yara na kustodiya sang Iloilo City Police Station 2 si Alyas Therese kag pagapangatubang sang kaso nga Extortion.
