Ginrason ni Ako Bicol Rep. Zaldy Co sa iya nga pag-resign sa pwesto ang mga ginaalegar pamahog sa iya kabuhi kag sa iya pamilya kag ang pagdingot sa iya sang iya kinamatarong sa due process sang layi.
Ini sa tunga sang pagtudlo sa iya nga isa sa mga involved sa budget insertions kag kickback scheme sa flood control projects.
“On the account of the real, direct, grave and imminent threat to the lives of my family and me, and the evident denial of my right to due process of law, I am constrained to tender with immediate effect my irrevocable resignation as a member of the House of Representatives,” pahayag sang anay kongresista.
Sa iya sulat kay House Speaker Faustino Dy III, ginpahayag sini nga epektibo gilayon ang iya nga irrevocable resignation bilang myembro sang Kamara kag ipahibalo lang ugaling sang Ako Bicol kun sin-o nga nominee ang magabulos.
Ginpahat-pahat man sini ang iya sabat sa mga alegasyon ni Navotas Lone District Rep. Toby Tiangco nga amo ang nagpasaka sang ethics complaint batok sa iya.
Hugot nga ginpanginwala ni Co ang mga last-minute insertions sa 2025 budget.
Ginsiling man sini nga wala siya sang ginpasa nga medical certificates sang nag-file sang leave of absence bangud nga wala man ini gina-require. Apang dugang niya, halin pa sang tunga-tunga sang 2024, nagabalik-balik na siya sa mga doctor abroad agud nga magpakonsulta.
May separado naman nga sulat si Co sa Ako Bicol Partylist nga nagasiling: “It is with great sadness that I inform you that I will be taking a leave of absence from the Ako Bicol Partylist starting today until such time as it is safe for me to return to the Philippines to resume my duties as a member and representative of our organization and to address the many false claims being made against me.”
Ginkumpirma naman ni Speaker Dy nga nabaton na sini ang resignation letter. Depende na suno sa iya sa Department of Justice kun ano nga kaso ang atubangon ni Co bangud wala na sang hurisdiksyon sa iya ang House Committee on Ethics kasunod sang pagpanaog sini sa pwesto.#
