Ginasuguran na ang konstruksyon sang P4.1 milyon sa pagpakay-o sang overpass sa Diversion Road, Barangay San Rafael, Mandurriao; apang pila ka residente nagapahayag sang kabalaka kag pamangkot kun mapuslan gid ini nga pag-reconstruct kag kun dapat bala i-prioritize ang amo nga proyekto.
Sa interview sang Bombo Radyo kay Alyas Erson, isa ka umalagi sa nasambit nga overpass, suno sa iya indi siya pabor nga panamion pa ang overpass bangud maayo pa man ini kag mas may kinahanglan nga tutukan sang budget pareho sang drainage areas, problema sa baha, kag kalimpyo sang palibot.
Base sa pagpangusisa, ginpatuman sang Stone Built Construction Services ang nasambit nga proyekto kag nagsugod ini sang Agosto 11, 2025.
Lakip sa mga ginaobra amo ang pagbutang sang atop, tiles, kag pagrepaint sang grills.
Bisan pa nga may mga scaffoldings nga ginplastar sa overpass, bukas gihapon ini sa publiko kag wala sang sira sa dalom, sa duha ka side kag wala man sang ‘barricade’ nga nagapugong sa mga nagalabay.
Makita man ang elevator nga naguba nga ginpahayag naigu sang kilat sang Hunyo 20, 2025, base sa papel nga nakatapik nga may sulat: “Sorry, Elevator is under repair. Cause of Damage: Lightning Strike, last June 20, 2025.”
Suno naman sa mga otoridad, padayon ang proyekto kag ginahingyo ang kooperasyon sang publiko samtang ginakay-o ukon ginapanami ang overpass.
(Reported by Bombo Bryan Gonzales, via Bombo Reports 2nd Edition)
