Nagapadayon ang reklamo sang mga motorista kag residente malapit sa Ungka Flyover bangud sa lubak-lubak nga dalan nga nagahatag sang kabudlayan sa mga nagaagi.
Ginapahayag sang mga pumuluyo nga bisan pa may ginpatuman nga ‘asphalt overlay’ sa pila ka bahin sang karsada, apang ang portion sa idalum sang flyover nga wala man ginaagyan sang salakyan amo pa ang gin-repair, samtang ang dalan nga pirmi ginadulungan sang mga motorista amo ang wala ginkay-o.
Bangud sini, magasumiter sang pormal nga sulat ang mga opisyal sang Barangay Ungka sa Department of Public Works and Highways Region 6.
Igalakip sa sulat ang mga litrato sang dalan kag ipabutyag nga masobra isa ka tuig na nga ginareklamo ini sang mga residente.
Ginatuyo sang barangay nga ipalab-ot sa DPWH ang seryoso nga epekto sini sa mga motorista kag mga nagatabok sa lugar.
Sa interview sang Bombo Radyo kay Punong Barangay Rodel Mamon sang Barangay Ungka, Jaro, Iloilo City, ginpahayag niya nga kabudlay na gid ang sitwasyon kag kinahanglan sang madinalag-on nga solusyon para malikawan ang disgrasya.
Ginpabutyag man ni Mamon nga apektado ang mga commuters kag mga tawo nga nagatabok, ilabi na kun mag-ulan kag nagadanaw ang tubig sa dalan.
Gindugang pa niya nga ang reklamo indi lang para sa barangay kundi para sa seguridad sang tanan nga nagaagi sa amo nga lugar.
Matandaan nga sang damlag lang, nagpabombo ang pila ka residente agud ipabutyag ang ila pagkadismaya sa padayon nga problema nga wala sa gihapon nasolusyonan./JDS
(Reported by Bombo Jomar Villa/ Bombo Reports 2nd Edition)
