Natukiban nga ang babaye nga nag-alegar nga nakakita sang bag-o bun-ag nga lapsag sa sulod sang tangkal kahapon nga adlaw sa Brgy. Anonang, Leon, Iloilo amo man gali ang matuod nga iloy sang bata.
Sa interview sang Bombo Radyo kay Police Lieutenant Mark Cortez, deputy chief of police sang Leon Municipal Police Station, iya ginkumpirma nga base sa ila imbestigasyon, ginhimu-himu lang sang babaye ang istorya nga iya nakita-an ang lapsag sa tangkal.
Ginkilala ang babaye kay alyas “Anna Mae”, 20-anyos kag ginapahayag nga may yara ini sang partner nga amo ang amay sang iya subang nga bata nga naga-edad 2-anyos.
Nahibaluan nga bulagay na sila sang iya nga partner nga taga-Passi City.
Wala pa nakumpirmar kun amo man ini ang amay sang iya bag-o nga ginbun-ag nga bata.
Suno sa pulis, gin-usisa sang Women and Children’s Protection Desk sang Leon si Anna Mae bangud nga ila ini nakita-an nga nagapanglapsi kag nakita-an man nga may yara sang mantsa sang dugo ang iya bayo kag likod sang iya paa.
Gin-ako man niya sa mga otoridad nga siya ang iloy sang bata kag iya lang ginhimu-himu ang iya ginpahayag kahapon nga iya nakit-an ang lapsag sa tangkal.
Gilayon ini gin-examine sang attending physician sa Aleosan District Hospital kag nakumpirmar nga bag-o lang ini nagbata bangud man sa nakita-an nga laceration sa iya kinatawo kun sa diin gintahi pa sang doctor.
Nahibalaun man nga siya mismo ang nagpabata sa iya kaugalingon sa sulod mismo sang ila balay.
Sandig sa imbestisgasyon sang mga otoridad, wala nakabalo ang pamilya sini nga nagbusong siya bangud nga gintago ni Anna Mae sa rason nga nahuya ini ipahibalo ang iya sitwasyon sa iya pamilya.
Sa karon, yara na ini sa kustodiya sang Women and Children’s Protection Desk agud mabuligan sa sitwasyon nga iya gina-atubang sa subong.
