Ginreklamo sang canteen manager sang Santa Barbara National Comprehensive High School, nga may insidente sang pagpanglapta kag ‘vandalism’ sa ila school canteen sang aga sang Miyerkules, mga alas 6:30, sang Oktubre 8,2025.
Suno sa canteen manager, nakita niya nga naganilapta na ang mga baligya nga pagkaon kag iban pa nga mga produkto, apang wala naman sang may ginkawat nga kwarta ukon bagay nga yara sa sulod sang canteen.
Ginabanta ang damage nga nagalab-ut sa P10,000.
Dugang pa, nakita man nga may vandalism sa dingding sang canteen nga may spray paint nga nagasiling “WALA KAMO PULOS,” “TBS RIR,” kag iban pa nga mga binastos nga tinaga.
Sa interview sang Bombo Radyo kay Police Captain Raffy Señeres, Officer-in-Charge sang Sta. Barbara Police Station, ginpahayag niya nga wala sang reported nga pagpangawat sa lugar.
Ginbanta nga duha tubtub tatlo ka persona ang posible nga responsable sa natabo nga insidente.
Ginsuspetsahan nga kahimuan ini sang gang ukon estudyante.
Padayon naman ang imbestigasyon sang kapulisan agud makilala ang mga responsable kag matapna ang pareho nga insidente sa palaabuton.|JDS
Reported by Bombo Bryan Gonzales/Bombohanay Bigtime
