Ginsulit lang sang Chairman sang Committee on Market and Slaughterhouse sa Iloilo City Council ang rason sang Local Economic Enterprise Office (LEEO) kun ngaa gin-demolish ang pila sa mga stall sa Iloilo Terminal Market ukon Super antes pa man ang opening sang bag-o nga merkado.
Sa interview sang Bombo Radyo kay Councilor Mandrie Malabor, iya ginpahayag nga santo sa iya nahibaluan sa LEEO, may areas nga gin-demolish bangud kinahanglan para sa “finishing” sang Super.
Suno kay Malabor, nagpasalig man ang talatalapan nga may temporaryo nga sayluhan ang vendors nga nagatinir sa gin-demolish nga stalls.
“From what I gathered sa aton nga LEEO Department Head, may mga areas nga gin-demolish kay kinahanglanon bala. Pero not all. Ang gin-demolish necessary para sa finishing sang aton nga Terminal Market. And from what I heard sa aton nga Department Head, may sayluhan temporarily ang gin-remove [nga vendors], kay ang iban nga stalls, from what I heard, indi man siya actively naga-operate,” pahayag sang konsehal.
Ginklaro man ni Malabor nga ang iya komitiba sa City Council ang nakatutok lamang sa pagpasar sang mga ordinansa nga naangot sa mga mercado. Suno sa iya, may separado naman nga market committee nga ginapangunahan sang local chief executive nga amo ang naga-deliberate kag naga-sentro sa implementasyon sang ordinansa.
Matandaan nga kun basehan ang mga vendors, wala sang klaro nga direktiba halin sa lokal nga gobyerno kon sa diin sila makapadayon sang ila palangabuhian.
Ila man ginbalikan ang pasalig sang LEEO nga Oktubre 20 ang target nga petsa sang demolisyon apang antes sini nga petsa, ginakuhaan na sila sang kuryente kag ginapahalin.
Sa bahin ni Malabor, ginplastar sini nga mahingagaw-bukas sa Oktubre 30 ang bag-o lang gin-develop nga Iloilo Central Market kag Iloilo Terminal Market santo man sa schedule nga gin-anunsyo sang Iloilo City Government.#
