Nalubog ang pila ka mga balay sa banwa sang Estancia, Iloilo matapos ang pagbubo sang mamunog nga ulan kahapon nga adlaw, Oktubre 18.
Suno kay Leon Rogador, Officer-in-Charge sang Municipal Disaster Risk Reduction and Management Office (MDRRMO) sa Estancia, gulpiyada nga nagtaas ang lebel sang tubig sa lugar matapos ang mabaskog nga ulan nga nagdugay sang tatlo ka oras.
Ginpahayag pa ni Rogador nga ang pagdula sang madamo nga mga kahoy sa kabukiran amo ang isa sa mga ginatudlo nga rason sang masami nga pagbaha sa ila banwa.
Sa pihak nga bahin, madasig naman ang pagresponde sang Estancia Fire Station personnel sa pagpanguna ni Acting Municipal Fire marshal SFO4 Allan John S Catalan, kaupod ang MDDRMO Estancia kag Edert Rescue-058.
Padayon naman ang pag-monitor sang MDRRMO sa mga apektado nga lugar samtang ginahingyo man ang mga pumuluyo nga magbantay kag maghalong ilabi na kun may mga indi maayo nga kondisyon sang panahon.
