Ginahangkat ni Iloilo 3rd District Board Member Jason Gonzales ang mga opisyales sa iya distrito kag mga pumuluyo nga magpadulong sa iya opisina kun may nasiplatan sila nga problema ukon kwestyonable nga flood control projects sa ila lugar.
Sa interview sang Bombo Radyo, ginpahayag ni Gonzales nga suportado niya ang kawsa ni Board Member Rolex Suplico nga magpatigayon sang imbestigasyon batok sa mga iregularidad nga proyekto.
Apang, iya ginpunto nga kinahanglan gihapon sang kontexto ukon motivating party sa amo nga projects, antes magpatigayon sang investigations.
Suno pa sa iya, sa subong wala pa siya sang may nakit-an nga flood control project sa ila distrito nga nagakinahanglan sang imbestigasyon.
Bangud sini, nagapanawagan si Gonzales sa tanan nga mga pumuluyo sang ila distrito nga magdala sang ebidensya sa iya opisina kun may makita sila nga kwestyonable nga proyekto.
Ginpaathag man ni Gonzales nga wala siya nagapamalabag sa plano ni Suplico nga mag-usisa sa mga proyekto.
Matandaan nga ginkatingala ni Suplico ang kadamuon sang mga flood control projects sa iya distrito nga wala nalakip sa listahan sang mga proyekto nga ginpaguwa sa “Sumbong sa Pangulo” website.
