Ginpangunahan sang duha ka mga kilala nga anti-corruption advocates sa pungsod nga sanday Prof. Cielo Magno kag Heidi Mendoza ang forum batok korapsyon nga nga ginhiwat sa University of the Philippines-Visayas.
Ang nasambit nga forum ang may tig-ulo nga “END CORRUPTION NOW: A FORUM ON TRANSPARENCY AND ACCOUNTABILITY.
Nasentro ang tema sa “End Corruption Now,”, nga ang tinutuyo sini amo nga pukawon ang publiko kag hayluhon ang mga Ilonggo nga mangin aktibo sa panawagan nga untaton ini paagi sa pag-promote sang transparency kag accountability.
Sa amo nga forum ginhatagan igtalupangod ni Kabataan Party-list Rep. Raoul Manuel ang mga proyekto nga may nakit-an nga anomaliya kaangay na lamang sang ginatukod nga overpass sa Diversion Road, Mandurriao kag waiting shed sa Molo, Iloilo City.
Ginplastar man sini ang pila ka mga proyekto sa syudad nga overpriced kag delayed nga nga ginpondohan paagi sa national ang local appropriations, sa diin nagatuga sa pagpugok sang trapiko kag pag-antos sang mga Ilonggo.
Samtang, naghatag naman sang reaction kag palanan-awan si Msgr. Meliton Oso sa mga ginatukod nga proyekto sa syudad sang Iloilo, particular na ang Flyover sa Aganan, Pavia nga madugay na nga wala pa natapos.
Suno sa iya, nagalaom ini nga makabugtaw ang tanan sa mga nasaksihan kag nabatian nga mga kamatuoran ilabi na sa lapnagon nga korapsyon sa pungsod Pilipinas.
Sa pihak nga bahin, ginkwestyon sang pila ka sektor ang paggamit sang Data Privacy Act bilang rason sang Iloilo City Government sa indi paghatag sang access sa media sa pila ka dokumento may kaangtanan sa paggamit sang pondo publiko.
Panawagan nila sa lokal nga panguluhan, “Kung ginakabig naton nga ang Iloilo City isa ka ehemplo sang good governance kag ginapahayag naton nga wala kita sang korapsyon, dapat ipakita naton ini sa buhat. We should walk the talk.”
Ginpangabay ang Iloilo City Government nga mangin mas bukas kag transparent sa ila mga transaksyon, ilabi na gid kun ini may kahilabtanan sa kwarta sang pumuluyo.
