Nagapanawagan si Msgr. Meliton Oso sa mga pamatan-on kag iban pa nga mga Ilonggo nga mag-upod sa ginatukod nga graft watch group agud mabantayan ang mga kurapsyon sa Iloilo.
Sa interview sang Bombo Radyo kay Oso nga amo ang director sang Jaro Archdiocesan Social Action Center, iya ginpahayag nga kinahanglan gid ang mga kabataan sa sini nga adbokasiya ilabi na ang ila nga masangkad nga ihibalo sa teknolohiya.
Kaangot ini sa platform nga tukuron sang graft watch agud nga may mapalapitan ang mga pumuluyo kun may makit-an nga kamala-malahan sa mga proyekto sa gobyerno.
“Be one with us. We need you. It is for your future that we are advocating a corruption-free Philippines,” suno kay Oso.
Magluwas diri, kinahanglan man suno kay Oso ang bulig sang mga abogado bangud tinutuyo sang grupo nga magpasaka gid sang mapag-on nga kaso pananglitan may makit-an nga mga iregularidad.
Sa subong suno sa iya, nabalay na ang pundasyon para sa graft watch group kag ginaplano man nga ipa-rehistro ini para may yara sang “juridical personality.”
Nahibaluan nga sa anti-corruption forum sa University of the Philippines Visayas kahapon, Oktubre 18, ginmensyonar ni Msgr. Oso ang pagtukod sang amo nga graft watch group agud matutukan ang isyu sang kurapsyon.
Partikular sini nga natuksuan ang duha ka kontrobersyal nga proyekto sa Iloilo City nga amo ang waiting shed sa Barangay Katilingban, Molo, nga nagabalor sang halos P800,000. Ang ikaduha nga namunuhan amo ang P4.1 million nga pondo nga gin-pain para sa improvement sang pedestrian overpass sa Diversion Road sa Barangay San Rafael, Mandurriao.#
