Ginahulat na lang sang Local Government Unit (LGU) sang Zarraga ang opisyal nga kompirmasyon halin sa Department of the Interior and Local Government (DILG) agud makapungko na ang bag-o nga alkalde kag bise alkalde sang banwa.
Ini matapos magguwa ang desisyon sang Ombudsman nga nagadismiss kay Mayor Jofel Soldevilla kag Vice Mayor Vice Mayor Michael Omar Lacson.
Matandaan nga gin-dismiss sang Ombudsman sa pwesto sanday Soldevilla kag Lacson matapos napamatud-an nga guilty ang mga ini sa Grave Abuse of Authority.
Ang kaso nag-ugat sa reklamo ni anay Konsehal Andre Bon Sumagaysay, nga may kaangtanan sa pagbakal sang duta sang 2023 nga ginapangalan sa amay ni Lacson, para sa proyekto sang gobyerno sang banwa nga sakop sang Local Shelter Plan (LSP).
Suno kay Dr. Jeffrey Silveo nga amo ang 1st Sangguniang Bayan Member kag posible magabulos bilang alkalde, wala pa sila sang opisyal nga komunikasyon halin sa DILG ukon sa Ombudsman angot sa status sang ila pag-assume sa posisyon.
Samtang wala pa sang klaro nga mando, magapadayon gihapon ang frontline services sang LGU.
Apang limitado ang pila ka transaksyon, labi na gid kun kinahanglan ang pirma sang alkalde, bangud bakante pa ang pwesto.
Sa pihak nga bahin, ginkabig ni Silveo nga nakakibot siya sa dismissal sang duha ka opisyales, bangud ginpanan-aw niya nga suspension lang ang masunod sa reklamo batok sa ila.
