Padayon ang pagproseso sang mga vendors sang ila mga permits sa Local Economic Enterprise Office (LEEO) bilang preparasyon sa pagbukas sang bag-o nga Iloilo Terminal Market sa Oktubre 30.
Sa interview sang Bombo Radyo kay Maricel Mabaquiao, head sang amo nga opisina, iya ginsabat ang mga reklamo sang pila ka mga vendors nga nagasiling nga wala sila nahatagan sang temporary stall samtang nagahulat sang pormal nga pagbukas sang merkado.
Suno kay Mabaquiao, wala nagkulang ang ila opisina sa pag-edukar kag paghatag sang impormasyon sa mga vendors parte sa temporaryo nga mga pwesto.
Ginpahayag niya nga may designated area nga gin-assign para sa kada isa ka vendor.
Dugang pa niya, apisar nga madamo ang mga vendors, nagbutang sila sang market in-charge nga amo ang naga-monitor sang mga pwesto kag nagaasikaso sang pang-adlaw-adlaw nga operasyon.
Nagpanghatag man ang LEEO sang mga lamesa bilang temporaryo nga gamit sang mga vendors para sa pagdisplay sang ila mga baligya.
Ginpahayag man ni Mabaquiao nga ginahimakasan sang ila opisina nga mapaamat-amat ang pagpasulod sang pila ka mga vendors antes pa man ang Oktubre 30, agud mas mapadasig ang transition sa bag-o nga Iloilo Terminal Market.
