Isa ang ginbawian sang kabuhi kag apat ang pilason matapos nag-amok ang isa ka pasyente sa sulod sang Aleosan District Hospital sa Brgy. Bancal, Alimodian, Iloilo.
Ang suspek amo si alyas Roy, residente sang Barangay Cagay, Leon nga na-admit sa nasambit nga ospital matapos ginpahayag nga nag-inom sang kemikal.
Sa interview sang Bombo Radyo kay Police Captain Chrysler John Ledesma, hepe sang Alimodian Municipal Police Station, iya ginpahayag nga i-discharge na kuntani ang suspek apang sang yara na ini sa nurses’ station, didto na sini ginpanglampusan ang mga tawo sa iya palibot gamit ang IV stand ukon salab-itan sang dextrose.
Isa sa napilasan amo ang 24-anyos nga nurse na si alyas Patricia nga residente ng San Miguel, Iloilo.
Nag-angkon man sang samad ang tatlo ka mga bantay sa mga pasyente sa ospital.
Ini amo sanday alyas Marjorie,48, residente sang Alimodian; alyas John, 23, residente sang San Miguel; kag alyas Frederico, 62, residente sang San Miguel.
Ang napatay naman amo si alyas Lilia, 80-anyos, residente sang Alimodian kag isa man sa mga pasyente sa ospital.
Siya ang nag-angkon sang pilas sa dughan nga gintunaan sang iya kamatayon.
Natigayon naman nga mapunggan ang suspek nga manghalit sa iban pa paagi sa bulig sang mga bantay sang iban nga pasyente.
Yara na kustodiya sang Alimodian Municipal Police Station ang suspek kag natalana nga pasakaan sang kaso nga homicide kag physical injuries.
