Nagtaliwan na ang content creator nga si Emman Atienza sa edad nga 19 anyos.
Ginkumpirmar ini sang iya mga ginikanan nga sanday Felicia kag Kim Atienza paagi sa isa ka joint post sa Instagram.
Apang, wala pa ginbuyagyag ang rason sang iya kamatayon.
Sa iya ulihi nga mensahe sa Instagram broadcast channel, ginpakigbahin ni Emman ang iya mga eksperyensya kag kabudlayan nga naangkon bangud sang pressure sa social media.
Ang amo nga post nga ginpahayag sang Setyembre 1, amo man ang nangin ulihi niya nga pahayag sa publiko, kun sa diin iya gin-ako nga gin-deactivate sini ang iya TikTok account.
Sa pihak nga bahin, nagapangabay naman ang pamilya ni Emman sa tanan nga tagasuporta sang ila anak nga dumdumon kag ikabuhi ang iya mayo nga pamatasan.
Si Emman ang kilala bilang isa ka masinadyahon nga content creator kag isa man ka aktibo nga mental health advocate.
Sang nagligad lang, nangin trending siya sa social media bangud sang iya panindugan sa isyu sang mga “nepo babies” kag sa gin-alegar nga maanomalya nga flood control projects.
