Nagpositibo ang anum ka mga drivers sa ginpatigayon kaina sang aga nga simultaneous surprise random drug testing sang Philippine Drug Enforcement Agency (PDEA) 6 sa mga public transport drivers, conductors kag mga dispatcher sa rehiyon.
Ang simultaneous operation ginpatigayon sa tanan nga mga dalagku nga terminals sa rehiyon nga ginalakipan sang Caticlan Bus, Van and Tricycle Terminal sa Aklan, San Jose de Buenavista Bus Terminla kag San Jose North Terminal sa Antique, Peublo de Panay Terminal sa Capiz, Ceres Terminal (Camalig. Jaro), Old Tagbak Terminal, Pavia Terminal kag Mohon Terminal naman sa syudad sang Iloilo.
Sa interview sang Bombo Radyo kay Ma. Graziella Tanaleon, spokesperson sang PDEA 6, iya ginpahayag nga sa kabug-usan, 1,013 ka mga transport personnel sa rehiyon ang nag-undergo sa drug test kun sa diin anum (6) ang nagpositibo sa initial screening sang surprise drug test sang PDEA-6.
Ang mga nagpositibo sa initial screening amo ang lima ka mga tricycle driver sa Funda Dalipe Terminal, San Jose, Antique kag isa naman ka truck driver sa Caticlan Transport Terminal sa Aklan.
Sa karon, magapaidalum pa sa confirmatory tests ang mga nagpositibo kag gilayon man nga ginpa-untat sila sa pagbyahe sang LTO.
Samtang, wala naman sang may nagpositibo nga mga drivers, konduktor kag dispatcher sa mga transport terminal sa syudad sang Iloilo.
Sa separado nga interview kay Dir. Ralph Rommel Torres, regional director sang PDEA 6, iya ginpahayag nga ang surprise drug test sa mga public transport drivers kag conductors, isa ka preparasyon sang ahensya sa nagahilapit nga tigkalalag 2025 agud masiguro ang seguridad sang tanan nga mga pasahero nga magabyahe.
Suno kay Dir. Torres, ang mga nagpositibo sa drug test, ipaidalum sa intervention kag posible nga ma-revoke ang ila mga license.
Pahayag pa niya ang mga wala nag-coordinate sa ila surprise drug test nga mga public transport drivers kag conductors, i-revoke man ang ila nga mga lisensya.
Dugang pa ni Dir. Torres, ang Oplan Harabas sang PDEA 6, indi lang ginahiwat subong nga Piyesta Minatay kundi isa gid ini tikang sang ahensya agud masiguro ang kaluwasan sang mga pasahero nga magabyahe sa dalanon kag malikawan ang mga disgrasya.
By: 𝑩𝒐𝒎𝒃𝒐 𝑲𝒓𝒚𝒍𝒍𝒆 𝑴𝒆𝒍𝒍𝒊𝒛𝒂
