Gina-monitor sang state weather bureau ang isa ka low pressure area (LPA) nga nagporma sa guwa sang Philippine Area of Responsibility (PAR) nga amo ang ginalantaw posible nga mangin una nga bagyo sa Pilipinas sa bulan sang Nobyembre.
Ulihi ini nga nakit-an sa kalayuon nga 1,710 kilometros nasidlangan sang Southeastern Mindanao sa guwa man gihapon sa PAR.
Suno sa Philippine Atmospheric, Geophysical, and Astronomical Services Administration (PAGASA), may medium chance nga mangin tropical depression ini nga LPA sa masunod nga 24 oras.
Posible ini nga magsulod sa PAR sa Domingo, Nobyembre 2, kag mahimo magbaskog samtang nga yara sa Philippine Sea.
Base pa sa weather bureau, mahimo ini maglab-ot sa typhoon category.
Wala man ginadula ang posibilidad nga mahimo ini nga super typhoon antes ang landfall sa Eastern Visayas area sa temprano nga bahin sang masunod nga semana.
Apang mahimo pa maglain ang forecast bangud sa guwa pa sang PAR ini nga LPA.
Nahibaluan nga gina-forecast sang ahensya nga may duha ukon tatlo ka bagyo nga magsulod sa sulod sang PAR sa bulan sang Nobyembre. Ang masunod nga tatlo ka lokal nga ngalan sang bagyo amo ang Tino, Uwan, kag Verbena.
Sa pihak nga bahin, apektado sang Intertropical Convergence Zone (ITCZ) ang Southern Luzon, Visayas, kag Mindanao halin kagab-i tubtob subong nga Byernes. Magadala ini sang lapta-lapta nga pag-ulan pati diri sa Western Visayas.
