Naggwa sa imbestigasyon sang otoridad nga ang pagkalubong sa utang ang rason kun ngaa nahimo sang isa ka amay nga i-hostage ang duwa ka anak kag patyon ang isa sa ila.
Natabo ang insidente sa Dasmariñas, Cavite matapos mag-amok ang nasambit nga amay nga may depresyon bangud sa utang.
Nahibaluan nga isa man ka babaye nga boarder sa apartment kun sa diin nagaistar ang suspek kag kabataan sini ang ginhimo man niya nga bihag.
Matapos ang negosasyon,napilitan nga magsulod ang mga pulis sang nabatian nila ang paghilibion sang kabataan nga kaangay nga ginabuno sang suspek.
Sang hana nga atakehon sang suspek ang mga pulis, didto na siya gintiro kag napatay.
Nadala pa ang kabataan sa ospital apang ginbawian sang kabuhi ang lima ka tuig nga bata samtang nakaluwas naman ang pito ka tuig nga magulang sang napatay.
Sa subong, pareho nga nahaya ang suspek kag ang iya bata nga siya mismo ang nagpatay.
Suno naman sa asawa, antes ang trahedya, pila ka adlaw nga wala nagakaon ang iya bana kag indi mapahamtang bangud sa problema sa utang.
