Wala sang makatupong sa pagpalangga nga mahatag sang isa ka iloy.
Bisan sa tion nga magpahuway na ini, pat-od nga indi gid mapanas sa panghuna-huna kag balatyagon sang iya bata ang iya ginhatag nga mga hakos, mga halok, kag adlaw-adlaw nga pagtatap.
“Kung waay si Mama, kabudlay gid para sa akon,” suno kay Raven, 12-anyos nga nagbisita sa Tanza Public Cemetery subong nga Undas.
Napatay ang iloy ni Raven sang 2023 sang naga-edad ini sang 45-anyos bangud sa balatian nga cancer.
“Pagkabati ko nga may nagsinggit, nagbugtaw ko. Kita ko si Mama ara sa dalom sang hiligdaan. Pagkakita ko sa hiligdaan, damo dugo,” panaysayon sini samtang ginabalikan ang adlaw nga nadula ang iya iloy.
Pahayag ni Raven, antes naglala ang kondisyon sang iya Mama, pila ka beses na ini nga nagguwa-sulod sa ospital.
Ginsugid man sini nga sang tion nga napatay ang iya iloy, may problema pa sa iya pamilya bangud may ginkawat ang iya amay. Napreso ini sang isa ka bes, apang sang ulihi nakaguwa man.
“Daw ginbuno lang ko sa puso kay waay na si Mama ko,” pahayag sini. Bilang agot sa apat ka mag-utod, indi gid sini malipatan kun daw ano siya kapalangga sang iya iloy.
Sa iya pagsindi sang kandila kag pagduaw sa lulubngan sang iya iloy subong nga adlaw, ginabalikan sini ang ila nagligad — istorya nga puno sang pagpalangga kag mga handumanan.
“Ginapalangga man ko ni Manong ko, pero na-miss ko lang nga ginapalangga ako ni Mama ko,” pahayag pa sini.#
