Ginpaidalum na sa full alert status ang tanan nga field offices sang Department of Social Welfare and Development (DSWD) bilang preparasyon sa pag-abot sang Bagyong Tino.
Suno sa report, sa pagsulod sang bagyo sa Philippine Area of Responsibility (PAR), ginalauman nga magaigo ini sa Visayas kag Northern Mindanao regions subong nga adlaw, Nobyembre 3.
Ginpahayag ni DSWD Assistant Secretary Irene Dumlao nga naka-preposition na ang mga relief goods sa mga bodega sang ahensya sa bug-os nga pungsod antes pa magluntad ang kalamidad.
Sa subong, ang Luzon kag Visayas Disaster Resource Centers sang DSWD ang may kapasidad nga makadeliver sang 18,000 tubtub 20,000 ka family food packs kada adlaw.
Preparado man ang DSWD nga mag-deploy sang mobile command center, mobile kitchen, water trucks, kag water treatment units kon kinahanglanon.
Sa subong, may kabug-usan nga 558,098 ka family food packs (FFPs) ang naka-preposition na sa mga bodega sang DSWD sa bug-os nga pungsod bilang kabahin sang ila disaster preparedness operations.
