Padayon nga suspendido ang tanan nga klase sa pampubliko kag pribado nga eskwelahan sa siyudad sang Iloilo sa tanan nga lebel subong nga adlaw Nobyembre 4 tubtob buwas Nobyembre 5 suno kay Mayor Raisa Treñas.
Gin-abiso man sang alkalde nga suspendido man subong nga adlaw, Nobyembre 4, ang trabaho sa Iloilo City Government kag tanan nga government offices bilang pagpreparar sa posible nga epekto sang Bagyo Tino.
Gina-engganyo man sang alkalde ang mga pribado nga establisyemento nga magpatuman sang pagsuspende sang mga trabaho para sa precautionary measures agud masiguro ang kaluwasan kag seguridad sang ila mga empleyado.
Samtang, ginpahayag man nga suspendido man subong nga adlaw ang trabaho sa Iloilo Provincial Capitol bangud man sa bagyo, base sa kumpirmasyon sang Iloilo Provincial Disaster Risk Reduction and Management Office ukon PDRRMO.
Magapabilin naman nga naka-alerto ang Emergency Operation Center kag Response Cluster Team sang Iloilo Provincial Government para sa pag-monitor sa kahimtangan sang panahon kag koordinasyon sa mga regional offices.
