Nagdangat na sa 104 ka mga pamilya ukon 361 ka mga indibidwal ang nag-evacuate sa PHINMA University of Iloilo kagab-i, Nobyembre 3 bilang preparasyon sa ginapaabot nga Bagyo Tino.
Sa interview sang Bombo Radyo kay Punong Barangay Shiela Doza sang Brgy. Ortiz, City Proper, iya ginpahayag nga ang mga nag-evacuate amo ang mga pumuluyo nga naga-estar malapit sa coastal area.
Suno kay Doza, tatlo ka panalgan ang na-occupy, kag ginabulubanta nga lima ka pamilya ang naga-tenir kada kwarto.
Ang mga senior citizen kag Persons with Disability (PWD) ang ginpahamtang sa ground floor.
Dugang pa, may relief goods nga ginpanghatag ang Department of Social Welfare and Development (DSWD) kag City Social Welfare and Development Office (CSWDO) agud may yara sang food packs ang mga evacuees.
Pahayag pa sang kapitan, nagaluto lang ang mga barangay officials sa Brgy. Hall kag ginadala sa evacuation center, bangud indi sila pwede nga makaluto sa sulod sang eskwelahan.
Sa subong, padayon naman ang pag-monitor sang mga otoridad sa evacuation center, kag ginalauman nga magadugang pa ang numero sang mga evacuees subong nga adlaw.
