Mahimo na nga mapanubo sa Tropical Cyclone Wind Signal (TCWS) No. 3 ang Iloilo City halin sa TCWS No. 4, suno sa Iloilo City Disaster Risk Reduction and Management Office (CDRRMO).
Ini ang ginpahayag ni Mr. Darwin Joemil Papa, Chief sang Disaster Response Division sang CDRRMO, matapos nga nagpakita sang paghinay si Bagyo Tino base sa ila ginahawiran nga datos.
Suno kay Papa, wala sang indikasyon nga mahimo pa ini nga mangin Super Typhoon.
Apisar pa sini, ginapahanumdom ni Papa ang mga pumuluyo nga magpabilin nga alerto kag indi magpakampante, bangud yara pa gihapon ang eyewall sang bagyo sa palibot sang syudad, nga nagadala sang makusog nga hangin kag posible nga pag-ulan.
Ginapanawagan man sang CDRRMO sa publiko nga magpabilin sa sulod sang ila mga balay kag maghulat sang mga opisyal nga abiso antes magguwa.
