Nautod ang krus nga nahamtang sa ibabaw sang simbahan sang Guimbal bangud sang mabaskog nga hangin kag ulan dala sang bagyo Tino.
Suno kay Guimbal Vice Mayor Christine “Ting Ting” Garin, ginakasubo sini ang insidente bangud ang krus amo ang isa ka importante nga simbolo sang pagtuo kag paglaum sang mga pumuluyo sang Guimbal.
Pahayag pa sang bise alcalde, magluwas sa krus, wala naman sang may na-record nga naguba nga mga estruktura sa amo nga banwa.
Ginklaro man sini nga tanan nga karsada kag taytay sa banwa sarang maagyan kag normal man ang lebel sang tubig sa mga sapa kag suba.
Apang, madamo sang mga puno sang kahoy ang nagkalatumba kag may pila ka mga salakyan ang nagkalaguba bangud sang nagkalahulog nga debris nga dala sang mabaskog nga hangin.
Samtang, gin-report man nga may yara sang 163 ka pamilya ukon 585 ka indibidwal nga ginpaidalom sa pre-emptive evacuation bilang pagpangaman sa posible nga peligro dala sang bagyo.
Nagpasalamat naman si Vice Mayor Garin bangud wala sang may na-report nga nasamaran ukon napatay sa paglaslas sang bagyo Tino sa banwa sang Guimbal.
