Naglawig pa sang pila ka minutos antes ma-recover kag ma-rescue ang mga tagbalay matapos matumbahan sang puno sang lubi ang ila puluy-an sa Barangay Concordia, Nueva Valencia, Guimaras kahapon.
Sa interview sang Bombo Radyo kay Teresita Siason, head sang Provincial Disaster Risk Reduction and Management Office (PDRRMO) Guimaras, iya ginpahayag nga safe na ang apat ka myembro sang pamilya nga napilpilan sang naguba nga balay matapos nga natumbahan sang puno sang lubi.
Suno kay Siason, naka-record ang ila opisina sang apat ka mga puluy-an nga partially damaged kag isa ka totally damaged bangud sang paglaslas sang bagyo.
Sa subong, padayon pa ang ginapatigayon nga verification kag assessment sang mga posible nga halit nga ginbilin sang bagyo Tino sa isla sang Guimaras.
Ginpahayag man ni Siason nga nagapadayon ang pag-monitor sang PDRRMO sa sitwasyon agud masiguro ang safety sang mga pumuluyo nga apektado sang bagyo.
Matandaan nga nag-landfall ang bagyo Tino sa San Lorenzo, Guimaras pasado alas-11 sang aga, nga nagdala sang mabaskog nga hangin kag ulan sa probinsya.
