Nagapabilin sa Wind Signal No. 1 ang syudad sang Iloilo kag ang pila ka mga banwa sa probinsya sang Iloilo samtang nga yara na ang Bagyo Tino sa kadagatan nga sakop sang Palawan.
Sa alas singko sa kaagahon nga weather bulletin sang Philippine Atmospheric, Geophysical and Astronomical Services Administration (PAGASA) subong nga Myerkules, Nobyembre 5, nabutang naman sa Signal Number 1 ang mga banwa sa central and southern portions sang Iloilo nga amo ang: Calinog, New Lucena, Maasin, Oton, Pavia, Dueñas, Barotac Nuevo, Guimbal, Iloilo City, Tigbauan, Anilao, San Miguel, Leon, Mina, Santa Barbara, Leganes, Dingle, Zarraga, Bingawan, Cabatuan, Alimodian, Dumangas, San Joaquin, San Enrique, Badiangan, City of Passi, Pototan, Lambunao, Tubungan, Igbaras, Janiuay, kag Miagao.
Signal number 1 man ang Guimaras, Aklan, nabilin nga bahin sang Antique, kag ang central kag western portions sang Capiz.
Napabilin naman ni Tino ang kabaskugon sini samtang nga yara ang mata sini sa coastal waters sang Linapacan, Palawan. Dala sini ang kabaskugon sang hangin nga 120 km/h malapit sa sentro kag pagmadlos nga tubtub sa 165 km/h. Nagahulag ini pa-nakatundan naaminhan nakatundan sa kadasigon nga 15 km/h.
Nag-landfall man ang bagyo sa Batas Island, Linapacan, Palawan 4:10 kaina sang kaagahon.
Antes sini, nag-landfall man ini sa Silago, Southern Leyte; Borbon, Cebu; Sagay City, Negros Occidental; San Lorenzo, Guimaras; Iloilo City; kag Magsaysay, Cuyo Islands, Palawan.
Sa forecast track, magaguwa ini sa Philippine Area of Responsibility (PAR) karon sa gab-i ukon buwas sa aga.
