Isa ang kumpirmado nga patay matapos gin-anod sang tubig baha sa Barangay Salvacion, Anini-y, Antique.
Ang biktima amo si Fausto Talbos, 50-anyos kag residente sang nasambit nga barangay.
Suno sa imbestigasyon, nagatabok sa suba ang biktima sakay sa balsa sang gin-anod ini sang mabaskog nga tubig-baha.
Gilayon nga napangita ang biktima kag nadala sa ospital apang gindeklarar nga dead on arrival.
May mga dalan man nga indi maagyan bangud sa landslides kag mudslides.
Sa Tobias Fornier, may landslides sa National Road sa Barangays Tagimtim kag Pacencia gani indi maagyan sang mga salakyan.
Sa Barangay Iba, Anini-y, may landslide man sa National Road.
Sa Laua-an, may landslide sa barangay road nga nagakonekta sa Pandanan kag Maybunga, kun sa diin may motorsiklo nga natabunan sang duta.
May yara naman sang kapin 25,600 pamilya ukon 79,900 ka mga indibidwal ang naapektuhan sang bagyo sa 402 ka barangays sa 18 ka banwa sa Antique.
