Nangin epektibo ang mga pre-emptive measures nga ginpatuman sang Iloilo City Government sa tion sang pag-abot sang Bagyo Tino, suno sa City Disaster Risk Reduction and Management Office (CDRRMO).
Sa interview sang Bombo Radyo kay Darwin Joemil Papa, head sang Disaster Response Division, iya ginpahayag nga ginpatuman ang mandatory evacuation sang Lunes sang hapon antes pa man magbaskog ang epekto sang bagyo.
Suno kay Papa, ang mga tikang nga ini ang ginbase sa worst-case scenario nga posible matabo sa siyudad kun maglala ang panahon.
Ginpahayag man sang CDRRMO nga kun wala ginpatuman ang mga pre-emptive measures, posible nga maglab-ot sa 40,000 ka mga residente ang maapektuhan kag 20,000 ang mangin kabahin sang mga gin-evacuate.
Apang bangud sa madasig nga lihok, 18,000 ka mga indibidwal lamang ang nag-evacuate kag nangin hilway sa katalagman.
Sa kabug-usan, wala sang na-record nga casualty ukon napatay sa amo nga kalamidad.
Ang CDRRMO nagapasalamat sa kooperasyon sang publiko kag sa maayo nga koordinasyon sang mga barangay officials sa pagpanguna sang lokal nga pamunuan.
