Nagakabalaka si anay House Committee on Appropriations Chairman kag resigned nga si anay AKO Bicol Partylist Rep. Elizaldy “Zaldy” Co nga patyon ini kaangot sa seryoso nga death threats nga iya nabaton kun magpauli siya sa Pilipinas.
Ginpahayag ni Atty. Ruy Rondain, legal counsel ni Co, seryoso kag credible ang mga pamahog sa kabuhi sang anay mamalidha.
Gin-athag man niya kun wala sang pamahog, tuyo gid sang iya nga kliyente nga mag-atubang sa imbestigasyon matapos na-involve ini sa isyu sang budget insertions nga balor P13 bilyon para sa infrastructure programs sa idalom sang 2025 national budget.
Si Co ang ginapahayag nga may kaangtanan man sa P285.5 milyon nga insertion sang pondo sa ghost flood control projects sa Naujan, Oriental Mindoro.
Suno pa sa abogado, paghugpa pa lang ni Co sa Ninoy Aquino International Airport (NAIA), may mga hired killers kag vigilante groups na nga magapauna-una nga patyon ini.
Dugang niya, may organisado man nga grupo sa Europe nga luyag man magpatay sa anay mamalidha.
