Ini ang nangin sabat ni anay Senate President Franklin Drilon sang ini ang ginpamangkot tuhoy sa ginapatigayon nga imbistigasyon sa maanomaliya nga flood control projects sa pungsod.
Suno kay Drilon, makabig niya nga tuman ka hinay ang development sang imbestigasyon sa diin madamo sang mga tawo ang padayon nga nagahulat sang possible nga resulta.
Pahayag pa sini, indi nangin mahapos ang nasambit nga investigation sa mga ghost projects sang pungsod, apang suno sa iya, nagakinahanglan lamang ini sang pagbuyluganay sang mga ahensya nga responsable diri.
Dugang pa sang anay senador, madamo na sang mga tawo ang akig sa korapsyon, ilabi na sa subong nga mahinay pa ang lakat sang imbistigasyon apisar nga may gintukod na nga Independent Commission for Infrastructure (ICI).
Matandaan nga ang ICI gintukod agud magbulig sa Ombudsman nga mapahapos kag mapadasig ang investigation sa maanomaliya nga mga proyekto sa pungsod.
Ginpabutyag man ni Drilon nga sa iya 34 ka tuig nga serbisyo publiko, wala siya naka-encounter sang lapnagon nga korapsyon kaangay sini.
Ginpahayag man niya nga possible umpisahan na sang Senado ang debate sa new independent commission, sa diin hatagan sang dako nga puder ang ICI agud mangin epektibo ang ila ginapatigayon nga imbistigasyon angot sa mga ghost projects sa pungsod.
