Imbestigaran sang Department of the Interior and Local Government (DILG) ang local officials nga nagbyahe sa luwas sang pungsod apisar may order halin sa ahensya nga nagadumili sang kaangay nga mga byahe samtang nagapalapit ang bagyo.
Magluwas sa interior department, ginatun-an man sang Malacañang ang posible nga mga sanction pananglitan mapamatud-an nga ginlapas sang mga local official ang order sang DILG.
Matandaan nga nagpaguwa anay sang mandu si Interior Secretary Jonvic Remulla sa sin-o man nga na-eleher ukon na-appoint nga local official nga indi pwede magbiya sa Nobyembre 9-15.
Ini agud mapangunahan nila ang preparasyon sa tion sang kalamidad kag mapatigayon man ang relief efforts.
Sandig sa lista sang DILG, pito ka mga alcalde kag isa ka board member halin sa Cebu ang yara sa United Kingdom sang naglaslas si Bagyo Tino.
Yara naman sa Germany si Isabela Governor Rodolfo “Rodito” Albano III sang nag-igu naman si Super Typhoon Uwan sa Isabela sang Domingo.
Nahibaluan nga sa idalom sang Republic Act No. 10121 ukon ang Philippine Disaster Risk Reduction and Management Act, may katungdanan ang local officials nga mag-organisar kag maghatag sang superbisyon sa ila nga local disaster risk reduction and management offices sa tion sang kalamidad.
Kun sin-o man ang mapamatud-an nga nagkomiter sang dereliction of duty, may multa nga P50,000 tubtub P500,000, kag mahimo mapreso sa sulod sang anum tubtub 12 ka tuig.
Sa mas mabug-at nga mga kaso, may mga opisyal nga mahimo gid mapahalin kag dagdagan sang perpetual disqualification sa government service.
