Ginmando ni Agriculture Secretary Francisco P. Tiu Laurel Jr. ang mas hugot nga pagbantay sa mga supermarket kag wet market agud masiguro ang husto nga pag-label sang frozen meat.
Ini bilang kabahin sang tikang sang Department of Agriculture (DA) nga protektahan ang mga consumer kag local nga manugbaboy.
Direktiba ni Laurel sa Agribusiness and Marketing Assistance Service (AMAS), Bureau of Animal Industry (BAI), kag National Meat Inspection Service (NMIS) nga magpatigayon sang nationwide inspection agud sekyaron ang pagsunod sang mga tindahan kag balaklan sa food safety kag fair trade regulations.
Kadungan ini sang tikang sang DA kag mga local hog producer para i-stabilize ang presyo sang karne sang baboy kag buligan ang mga nagasagod sang baboy nga apektado sang pagnubo sang farmgate prices.
