Nagpatigayon sang konsultasyon si Iloilo City Mayor Raisa Treñas may kaangtanan sa franchise application sang Green GSM EV Taxi nga nagatuyo mag-operate sa Iloilo City.
Upod sa sinapol amo sanday LTFRB-6 Legal Officer Atty. Jun Altura, ATOP President Pitong Yap, Western Visayas Alliance of Transport Cooperative and Corporation, Inc. President Sherry Rose Songano, Traffic Management Unit (TMU), City Engineer’s Office (CEO) kag City Council Transportation Committee Chair Atty. Sedfrey Cabaluna.
Sa interview sang Bombo Radyo, ginpahayag ni Altura nga ginpahibalo sila sang LTFRB Central Office nga may franchise application ang Green GSM EV Taxi kag ini gin-endorso sa LTFRB Region 6 para sa pagproseso.
Ang Green Electric Taxi isa ka Vietnam-based taxi service nga nag-operate sa idalom sang Green and Smart Mobility Joint Stock Company (Green GSM), kag pareho sang sistema sang ride-hailing services kaangay sang Grab.
Suno kay Altura, indi pag-endorsohon sang LTFRB Region 6 ang franchise application sang Green GSM EV Taxi bangud may commitment ang ahensya sa syudad nga tatlo ka tuig nga moratorium sa taxi kag TNVS applications.
Apang gin-athag ni Altura nga ang ulihi nga desisyon magadepende gihapon sa LTFRB Central Office.
