Dismayado si Iloilo City Councilor Rex Sarabia sa pag-reject sang Department of Public Works and Highways – Iloilo City District Engineering Office (DPWH-ICDEO) sang hingyo sang Iloilo City Council nga dokumento angot sa flood control projects sa syudad sang Iloilo.
Ini nga request ang ginpaagi sa Quad Com on Waterways.
Matandaan nga nagpadala sang sulat ang City Council sa amo nga talatapan agud nga maghinyo sang mga nasambit nga dokumento sang Oktubre 29, bilang kabahin sang gina-conudct nga imbestigasyon sa mga proyekto sang DPWH sa Lone District.
Sa interview sang Bombo Radyo kay Sarabia, iya ginpahayag nga nalakip sa mga gin-request sang syudad amo ang feasibility studies, bid bulletins, project contracts, payments release, inspection reports,detailed engineering designs, project impact analyses, kag statement of work accomplishments.
Suno sa konsehal, ang paghingyo sang dokumento ang kabahin sang ila inisyatibo agud masekyar ang mga iregularidad nga Proyekto sa syudad sang Iloilo.
Ginpahayag pa sini nga bangud ang Iloilo ang isa sa mga gina ehemplo ni President Ferdinand Marcos Jr. pag-abot sa palpak kag delayed nga mga proyekto.
Dugang pa niya, isa man sa mga rason sa pag-request sang dokumento agud madeterminar kun ang mga proyekto nga ginatukod sa syudad sang Iloilo ang naghalin sa National Expenditure Program ukon Budget Insertion sa General Appropriations Act.
Pahayag pa ni Sarabia, nakabaton siya sang letter gikan sa DPWH-ICDEO sa diin wala sila ginpahanugotan nga makakuha sang mga nasambit nga dokumento sa diin suno sa amo nga opisina makabig ini nga isa ka “prejudicial premature disclosure”.
Ginklaro ni Sarabia nga wala sang intensyon ang komitiba nga magpakamalaot sa mga ginaalegar violations sang layi sa bahin sang ICDEO.
Apang, luyag lamang nila nga masolusyonan ang wala-untat nga problema sang pag-binaha sa syudad.
