Ginpahalin sa puwesto ang hepe sang PNP-Drug Enforcement Group-Special Operations Unit (PDEG-SOU) sa Region IV A kag 14 ka iban pa nga mga pulis bangud sa kaso nga pagpangawat kag paghimulos sa isa ka Grade 9 student sa isa ka anti-illegal drug operations sa Bacoor City, Cavite.
Suno sa otoridad, ang target sang operasyon amo ang nobyo sang biktima nga si alyas “Nena” apang nakapalagyo ang lalaki.
Ang lalaki nga target ang may daan na nga kaso sa iligal nga druga kag ginakabig man ini nga High Value Individual (HVI).
Suno kay Nena, sang amo nga tion, ginhimuslan siya sang mga katapo sang operatiba.
Gin-alegar man nga ginkuha sang mga operatiba ang motorsiklo sang suspek kag ginkarga sa ila service vehicle.
Ginpanginwala naman sang mga pulis ang alegasyon nga ginhimuslan nila ang babaye.
Gindugang naman ni P/Brig. Gen. Elmer Ragay, acting director sang PDEG, nga nakamaskara ang mga pulis sa buy-bust kag ini ang hugot nga ginadumilian base sa standard operating procedure (SOP).
Magapatigayon naman ang National Police Commission (Napolcom) sang full-scale investigation sa robbery-rape incident.
