Temporaryo nga dumilian ang pagpangisda sa pila ka parte sang Iloilo River halin Disyembre 1, 2025 tubtob Marso 31, 2026.
Ini matapos napasar ang regulation ordinance no. 2025-027 ukon ang ordinansa nga naga-establisar sang closed fishing season sa Iloilo river halin sa Drilon Bridge tubtob Diversion bridge para sa fish stock restoration, livelihood improvement kag river biodiversity conservation.
Sa interview sang Bombo Radyo kay Ely Estante, executive assistant for agriculture, iya ginpahayag nga ini ang na-base sa study sang Bureau of Fisheries and Aquatic Resources (BFAR) nga sa amo nga mga bulan ang spawning ukon pagpamuto sang mga isda kaangay sang bulgan.
Suno kay Estante, dako ini nga bulig para sa pagpadamo sang isda agud nga pagkatapos sang 4 ka bulan may ara naman sang pamuniton ang mga pumuluyo.
Sa idalom sang ordinansa, ang sin o man nga magbayolar ang may ara sang penalidad:
1st offense: multa nga P1,000 ukon community service
2nd offense: multa nga P2,000 ukon community service
3rd offense: multa nga P5,000 kag confiscation sang catch and fishing gears kag pag-impound sang fishing boat.
Ang Office of the City Agriculturist ang nagakoordinar sa Bantay Dagat, Philippine National Police kag Barangay Officials para sa enforcement sang amo nga ordinansa.
