Makabaton sang P2 million nga reward ang bisan sin-o man makatudlo sa mga suspek kag mastermind sa pagpatay kay Barangay Captain Oscar “Dodong” Bucol Jr. sang Tres de Mayo, Digos City.
Ginsiling ni Atty. Israelito Torreon, legal counsel ni Vice President Sara Duterte nga magapondo ang Bise Presidente sang P1 million nga reward agud matunton ang mga yara sa likod krimen.
Samtang, magahatag man ang P1 million si Davao del Sur Governor Yvonne Cagas, sa diin P500,000 ang nakapondo para sa makadakop sa gunman, kag P500,000 naman para sa makatudlo sa mastermind.
Ipaidalom man sa paraffin test ang pila ka mga person of interest, lakip ang isa nga namitlang sang biktima antes siya ginbawian sang kabuhi nga si PLtCol. Peter Glenn D. Ipong.
Masobra 21 ka mga personnel ang gin-relieve sa ila pwesto agud masiguro nga indi maapektuhan ang nagapadayon nga imbestigasyon.
Ginaihibalo sang mga imbestigador ang pila ka mga possible nga motibo sa pagpatay, lakip ang personal nga hiligut-anon, pulitika, sugal, kag Negosyo.
Suno sa pinakaulihi nga update, nagapadayon ang CCTV review agud mahibaloan ang possible nga entry kag exit sang salakyan sang mga suspek.
Sa opisyal nga pahayag sang LGU, ginkilala si Kapitan Bucol bilang indi lamang lider sang barangay, kundi haligi sang komunidad, abyan, kag loyal nga lingkod-bayan nga maisog nga nagaserbisyo sa iya mga pumuluyo.
Gintawag sang LGU ang insidente bilang isa ka dako nga trahedya para sa Barangay Tres de Mayo, ka ila ginahingyo ang kumpleto, patas, kag madasig nga imbestigasyon halin sa mga awtoridad.
