Ginpabutyag ni Iloilo City Councilor Nene Dela Llana ang iya suporta sa gina-proponer nga programa ni Senador Ping Lacson nga may kaangtanan sa paghatag sang ayuda pinaagi sa Pantawid Pamilyang Pilipino Program ukon 4Ps.
Nahibaluan nga ginserbe bilang ehemplo ni Sen. Lacson ang syudad sang Iloilo angot sa pagbuhin sa ginahatag nga ayuda paagi sa Assistance to Individuals in Crisis Situation (AICS) sang Department of Social Welfare and Development (DSWD).
Sa interview sang Bombo Radyo kay Dela Llana, iya ginpahayag nga suportado sang Iloilo Council ang ginadihon nga imbestigasyon sang DSWD sa mga mga isyu sang releasing sang ayuda sa pila ka mga kabaranggayan sa syudad.
Suno sa konsehal, gina-abi abi man nila ang desisyon sang ahensya nga isahon lang ang lugar nga pagapatigayon sang releasing sang bisan ano nga ayuda, agud nga malikawan ang iregularidad kag masiguro nga husto ang proseso.
Gindugang pa sang konsehal nga kuntani ang mapilian nga lugar sa releasing dapat open venue kag may presensya sang media para mangin mas transparent ang tanan nga lihok kag malikawan ang pagduda sang publiko.
