Ginklaro ni Punong Barangay Joseph Poral sang Barangay Tacas, Jaro nga alegasyon lamang ang nagalapta nga isyu may kaangtanan sa ginpatigayon nga pay-out sang Assistance to Individuals in Crisis Situation (AICS) sang Department of Social Welfare and Development (DSWD) sa ila lugar.
Sa interview sang Bombo Radyo PB Poral, iya ginpahayag nga tuman gid ang iya kakibot sang mabatian nga nadalahig ang iya barangay sa amo nga kontrobersiya, samtang wala man sang natabo nga ano man nga klase sang pay-out sa Tacas.
Suno sa iya, wala man siya sang ideya kun sin-o ang nagapamangkot ukon nagapanglista sang mga benepisyaryo sa ila barangay, kag kun may matuod gid nga releasing, kuntani una siya makahibalo bilang kapitan sang lugar.
Ginpaathag pa ni Poral nga matinlo ang iya konsensya kag wala gid siya sang ideya sa ginapanghatag nga AICS nga ginareklamo, bangud wala man ini nag-agi sa iya opisina.
Ginpangabay man niya ang nagareklamo nga kun may kamatuoran gid ang ila alegasyon, magpadulong lamang sa Barangay Hall kag isugid ang impormasyon kag pangalan sang nagkuha sang bahin sang ayuda agud matigayon nga masolusyunan amo nga problema.
Sa pihak nga bahin, ginpahayag ni PB Poral nga handa siya nga magpaidalom sa imbestigasyon sang DSWD kun kinahanglan para mapat-od ang kamatuoran sa likod sang isyu bahin sa AICS.
