Indi kumbinsido ang ordinaryo nga mga pumuluyo nga makaigo ang P500 nga budget para sa Noche Buena.
Ini ang kalabanan nga reaksyon matapos ginpahayag ni Trade Secretary Cristina Roque nga bastante na ini nga budget para makahimo sang handa sa Paskuwa kaangay sang ham, macaroni salad, kag spaghetti.
Sang ulihi, ginklaro sang tiglikom ang ang iya buot silingon nga budget nga P500 ang makaigu lamang para sa apat ka miyembro sang isa ka pamilya — ukon ang amay, iloy, kag duha ka kabataan. Pahayag pa sini, nakadepende man sa pamilya kun simple lang ang ila nga Noche Buena.
Sa interview naman sang Bombo Radyo sa isa ka bumalakal nga si Margarita Cantor, iya ginpahayag nga sa haluson gani maka-igo ang P1,000 kun magluto sang isa ka kilo nga macaroni salad.
Ginpahayag sini nga masami siya nga nagaluto gani pamilyar siya sa presyo sang mga balaklon subong kag kun ano kalayo ang pahayag sang DTI.
Suno naman kay John Fofanda, isa ka traysikad driver, kun siya ang papilion, manok, softdrinks, kag tinapay lang ang mabakal sini sa budget nga P500.
Pahayag sini, halin sa mantika, tubig, tubtub sa tanan nga panakot, ginabakal na subong gani tuman gid ka kulang ini nga budget.
Kasunod sang statement sang DTI, nagpaguwa naman sang mga statement ang pila ka mga mamalidha kaangay kanday Bicol Saro party-list Rep. Terry Ridon, Akbayan party-list Rep. Percival Cendaña, kag ACT Teachers party-list Rep. Antonio Tinio nga nagakwestyon sa ahensya sa basehan sang presyo sang mga item nga kinahanglan para sa Noche Buena.
“That would suffice if you travel back in time. While people are drowning in high prices, such gimmicks are very insulting. It would be better if the government would certify as urgent the proposals for a P200 salary increase so that the workers would have something for their celebrations this Christmas,” suno kay Cendaña.
Nainsulto naman si Tinio sa statement sang DTI. “How dare the DTI insult Filipino families with this outrageous claim that P500 is enough for Noche Buena? What kind of a Christmas is that—a few noodles, egg, and water? This is a slap in the face to every working Filipino struggling to make ends meet,” kabahin sang sabat sang kongresista.#
